Tað hendi á Buckingham Palace í dag, har Charles kongur tók ímóti Labour-leiðaranum og bað hann skipa nýggja bretska stjórn.
Sambært Buckingham Palace játtaði Burnham umbønini frá konginum og varð síðani formliga útnevndur forsætisráðharri. Kongshúsið skrivar, at Burnham "kysti hondina" á konginum, men sambært BBC var talan í veruleikanum um eitt handtak, sum eisini sæst á myndunum frá løtuni.
Burnham var í audiens saman við konu síni, Marie-France van Heel.
Stutt frammanundan hevði fráfarandi forsætisráðharrin, Keir Starmer, verið hjá Charles kongi, har hann formliga legði frá sær embætið.
Andy Burnham varð valdur í bretska Undirhúsið á einum eykavali í juni. Tá var hann borgarstjóri í Greater Manchester, men legði tað starvið frá sær, tá hann varð valdur í tingið.
Keir Starmer boðaði fyrr í juli frá, at hann fór frá sum formaður í Labour. Tí varð einki formansstríð, og Burnham gjørdist nýggjur leiðari í flokkinum.
Starmer hevði verið Labour-formaður síðani 2020 og forsætisráðharri síðani valið í 2024. Hann fór frá eftir drúgvar atfinningar fyri ikki at hava betrað um privatbúskapin hjá bretskum húsarhaldum og fyri handfaringina av innflytingarmálum.
Ritzau/BBC
