– Í breiðari semju hevur Løgtingið hækkað útgjaldið í barsilsskipanini til 30.000 krónur.
Soleiðis greiddi løgmaður frá í ólavsøkurøðuni. Og hann helt fram og vísti á, at í heyst fáa foreldur størri frælsi at býta barsilstíðina, og foreldur, sum fáa ov tíðliga fødd børn, tvíburar ella fleirburar fáa longri barnsburðarfarloyvi. Ætlanin er eisini at tryggja eitt minstaútgjald úr skipanini.
– Hetta lættir um gerandisdagin, staðfesti løgmaður.
Gamaní. Allur bati bøtur. Men Barsilsskipanin er í roynd og veru ein skipan, sum alt Løgtingið eigur at skammast av. Tí her hava øll tingfólk víst, hvussu lítla virðing tey hava fyri skipanini, sum fór at virka 1. juni í 2001 – og sum tá var so nógv betri, enn hon er í dag.
Kanska tað er tí, at tað fyri tað mesta eru kvinnur, sum fáa pengar úr Barsilsskipaini, at hon hevur verið so lágt raðfest millum tingmenn og tingkvinnur, og millum landsstýrismenn og landsstýriskvinnur.
Skipanin var fín, men í 2004 hildu tingmenn og tingkvinnur, at hon var for dýr. At mammur og nakrir fáir pápar fingu ov nógvar pengar úr skipanini. Tí varð hægsta útgjald lækkað úr 35.000 krónur um mánaðin niður í 25.000 krónur um mánaðin. Og síðani hevur tað staðið í stað – í 20 ár!
Seinastu tíðina hava samgonga og andstøða kappast um koma við uppskoti um at hækka útgjaldið. Men álvaratos. 5.000 krónur oman á eina skipan, sum hevur verið afturútsigld í 20 ár, hvat hugsa tingfólk fyri sær? Um skipanin skuldi verið á sama støði sum í 2001, so hevði hon verið komin upp á eitt hægsta útgjald upp á 61.000 krónur. Tað vil siga, at fólk sum tjena so upp til 61.000 krónur kundu fingið fult lønarendurgjald, meðan tey vóru í barnsburarfarloyvi.
Taka vit almenna arbeiðsmarknaðin, til dømis tingfólk, so er teirra løn vaksin 74,6 prosent síðani 2001. Hevði barsilsútgjaldið vaksið tað sama, so var hægsta útgjaldið komið upp á 61.000 krónur í dag. Um vit bara brúka inflatiónsroknaran hjá Hagstovuni, so var hægsta útgjaldið slakar 50.000 krónur.
Tá høvdu øll havt ráð at farið í barsil. Tí hann sum tjenar meira enn 50.000 ella 61.000 krónur hevur ikki fyri neyðini fult útgjald.
Nú er hægsta útgjald á støði við eina arbeiðaraløn. Tað vil siga, at tað bara eru tey lægst løntu í samfelagnum, sum fáa eitt barsilsútgjald, sum líkist lønini, tey fáa.
Hetta stigið hjá Løgtinginum, sum varð einmælt samtykt, (27 - 0 - 0), hevur tí verið sera hálvhjartað barnafamiljunum at frama.
