Tvey føroyingalið vóru í leiki í næstbestu donsku fótbóltsdeildini í kvøld.
Adrian R. Justinussen var við frá dystarbyrjan, tá hann og liðfelagarnir í Hillerød leiktu javnt 2-2 móti Vendsyssel FF.
Teir í Hillerød kunnu veruliga iðra seg, tí Vendsyssel javnaði til 2-2 fýra minuttir inni í tíðini dómarin hevði lagt aftrat. Finski málverjin hjá Vendsyssel, Lasse Schulz stútaði bóltin í netið aftaná eitt hornaspark.
Longu aftaná 33 minuttir hevði Markus Bay við tveimum málum syrgt fyri, at Hillerød var á odda 2-0, men tað bar ikki til ein sigur.
Hillerød er nummar sjey í deildini við 14 stigum.
Hørður H. Askham var við frá dystarbyrjan hjá Roskilde FC, ið mátti leggja rygg til eitt 1-4 tap fyri Hobro á útivølli.
Roskilde fekk annars eina dreymabyrjan, tá Arman Taranis legði útiliðið á odda longu í sætta minutti. Átta minuttir seinni hevði Hobro javnað, og í seinna hálvleiki tryggjaði Hobro sær sigurin við at skjóta trý mál aftrat.
Roskilde er aftast í deildini við bert fýra stigum.
Nú fara føroysku leikararnir at hugsavna seg um uppgávurnar í Nations League á heimavølli á Tórsvølli móti Armenia og Lettlandi.
