Uppskotið um at hækka pensjónsaldurin skjótari enn tað longu er samtykt í fólkapensjónslógini frá 2018, varð tikið aftur á tingfundi 19. mai í ár. Serliga vóru tað fakfeløgini, sum mótmæltu harðliga.
Men hvussu verður við hesum uppskotinum, verður tað lagt fyri tingið aftur?
– Uppskotið varð tikið aftur, tí vit vildu fyrireika tað betri við tíðartreytaðu pensjónini. Fakfeløgini siga seg ikki vera ímóti at pensjónsaldurin hækkar, men vilja serliga hava tað øðrvísi við tíðartreytaðu pensjónini.
Tað sigur Aksel V. Johannesen millum annað í samrøðu við Sosialin.
– Vit hava tikið ímóti útrættu hondini frá fakfeløgunum. Landsstýrismaðurin í almannamálum hevur havt fund við okkurt arbeiðarafelag men ikki við øll enn, men tað fer hann at hava fyri at vita, um tað ber til at gera semju við fakfeløgini um, hvussu tað kann snikkast saman. Av tí at allir fundirnir ikki hava verið, kann eg ikki siga, hvussu tað verður, men uppskotið verður lagt framaftur, men soleiðis at fakfeløgini kunnu taka undir við tí, sigur løgmaður við Sosialin.
Tá løgtingið í 2018 broytti lógina um fólkapensjón varð samtykt, tey sum eru fødd eftir 1. juli 1957 skulu pensjónerast, tá tey eru 67,5 ár, og at tey, sum er fødd eftir 1962 verða pensjonerað, tá tey eru 68 ár. Síðani varð samtykt at fimta hvørt ár, fyrstu ferði í 2025, skal støða takast til, um pensjónsaldurin um 10 ár kann hækka við í mesta lagi einum hálvum ári í senn.
Spurdur hví tey ikki brúka hendan leistin, men vilja hava tað at ganga nógv skjótari, sigur løgmaður, at tað eru ráðini frá Landsbankanum og Búskaparráðnum, sum vilja hava hækkingina í pensjónsaldrinum at ganga nógv skjótari, enn ásett er í galdandi lóg.
– Tað er so tað, sum politisk semja er um í samgonguni, og vit hava ikki aðra semju enn hesa enn, sigur løgmaður í samrøðuni við Sosialin.
Uppskotið hjá landsstýrinum var, at pensjónsaldurin skal vera komin upp á 70 ár í 2042, sum trivnaðarnevdnin broytti til 2040. Men tað málið varð sum kunnugt tikið aftur, og má leggjast fram aftur av nýggjum.
– Nú verður hetta so tikið til nýggja viðgerð og samráðingar við fakfeløgini, so fáa vit at síggja, hvat úrslitið av tí verður, sigur Aksel V. Johannesen, løgmaður.
