HSF skrivar:
- Hóast tepurt tap, so sýndu føroysku U18-mennirnir gott spæl móti sterku Íslendingunum í fyrra venjingardystinum millum liðini. Ísland vann 32-28, eftir at liðini vóru ájøvn 14-14 í hálvleikinum.
Dysturin gekk javnt á fyrstu løtuna, men vunnu íslendingar sær eina lítla leiðslu um miðjan hálvleik, har okkara vóru óhepnir við villum og brendum skotum trimum álopum á rað. Talan er um ein sterkan íslendskan árgang, og sýndu teir eisini hetta í leiki við góðum, knøppum spæli og við krops- og skotstyrki. Føroyska verjan ernaðist tó so líðandi og stóð heilt væl í løtum. Føroyar fóru yvir til at spæla 7 móti 6 og hepnaðist hetta væl, har Boas Ellefsen á Skipagøtu stýrdi, og Teitur Hellisdal Poulsen skoraði tríggjar ferðir á rað á vinstra vongi. Føroyar vunnu íslendsku leiðsluna aftur og fóru liðini til hálvleiks við 14-14.
Føroyingar skiftu nógv út í dystinum, serliga í seinna hálvleiki. Rútman fór nakað av lagi í løtum og vóru heldur fleiri villur í seinna hálvleiki. Ísland hevði munin allan seinna hálvleik, hóast hann ikki var stórur. Ársins leikari í Burn deildini 2025-26, Boas Ellefsen á Skipagøtu, var mest eyðsýndur í føroyska álopinum og gjørdi hann 11 mál í dag. Ísland hevði munin seinastu løtuna og endaði dysturin 32-28.
Vinardystirnir eru liður í fyrireikingunum til EM-endaspælið, sum verður í Beograd í Serbia í døgunum 29. juli til 9. august. Liðini møtast aftur í morgin kl. 17.00, føroyska tíð. Skrivar HSF.
Dystargongdin Ísland – Føroyar:
5 min. 3-2
10 min. 5-5
15 min. 8-5
20 min. 11-8
25 min. 12-10
30 min. 14-14
35 min. 17-16
40 min. 20-18
45 min. 23-22
50. min 26-24
55 min. 30-27
60 min. 32-28
Málskjúttar hjá Føroyum:
Boas Ellefsen á Skipagøtu 11
Teitur Hellisdal Poulsen 4
Teitur Bogason 3
Hugin Halgirsson 2
Jóan Petur Mortensen 2
Ragnar Heinason 2
Gabriel S. Árnason 2
Axel Holm Simonsen 1
Mortan Eyðunarson 1
Málverjar:
Micah Wardum Ragnarsson, 35 min., 7 bjargingar
Jákup Arngrímsson Müller, 25 min., 6 bjargingar
