Góði Jóhann,
Hjartaliga tillukku við stóra degnum!
Tað er okkum ein sonn gleði at skriva hesa heilsanina til tín og minna á allar tær góðu løturnar, vit hava havt saman. Vit minnast enn við gleði teir mongu túrarnar, vit vóru á rossabaki til Bátastevnuna í Vestmanna – tað var altíð eitt satt ævintýr!
Eitt sindur forfangiligur hevur tú tó altíð verið, sum tá ið vit sótu á Norðadalsskarði og ótu pannukøkur frá Sólju, og tú tók neglaklipparan fram og setti teg at klippa negl á tærnum.
Vit kunnu heldur ikki gloyma túrarnar vit hava verið í Ísland, har vit hava riðið gjøgnum vakra landslagið, verið á Landsmót, koyrt runt við húsbilum og ikki minst tá tú hevur verið við umborð á Norrøni sum rossaflutningsástøðingur.
Og so eru tað sjálvandi skíðferiurnar, sum hava tikið okkum víða um í Evropa – Eysturíki, Bulgaria, Italia, Svøríki og síðst Fraklandi. Tað hevur altíð verið eitt satt upplivilsi at ferðast saman við tær og tíni betru helvt Sólju og tykkara nærmastu.
Tú hevur eisini verið ein ómetaliga stór hjálp, tá ið vit fyrst í 2000 byrjaðu at byggja Berg Hestar Ríðihøllina. Uttan tína hjálp bæði við hamara og penni í hond – hevði tað ikki verið tað sama. Tú ert ikki bara dugnaligur, men eisini ótrúliga væl vitandi. Tín vitan og áhugi innan fyri føroyskari mentan og siðvenju hevur sett djúp spor, og tín kenda rødd í føroyskum miðlum hevur verið týdningarmikil. Vit halda, at øll kunnu vera samd um, at tú ert ein framúrskarandi journalistur – altíð við einum skørpum penni og einum eyga fyri góðum søgum.
##med2##
Sendingin Dansival er eitt gott dømi um hetta – har tú skapar eitt heilt serligt rúm fyri føroyskari kvæðamentan og har lurtarnir sita við opnum oyrum, og bíða spent til sendingin byrjar eftir tíðindini fríggjakvøld. Og áðrenn tað, so minnast vit væl sendingina Frítíð og Náttúra – enn eitt dømi um, hvussu tú hevur verið við til at varpa ljós á tað, sum tú brennur fyri.
Tað, sum ger teg heilt serligan, er ikki bara tín vitan og evni, men eisini títt hjarta fyri náttúruni. Tú ert ein sannur stríðsmaður fyri at náttúran skal hava tað gott, og títt arbeiði og tín hugsjón eru ein íblástur fyri okkum øll.
Vit vilja ynskja tær ein fantastiskan føðingardag, og vit gleða okkum til fleiri upplivingar – bæði á rossabaki og á skíðum!
Síggjast til eina góða veitslu!
Vinarliga heilsan,
Vit trý í Marknagili
