Tað skrivar AP.
Tangin hoyrir til eina verksmiðju hjá GKN Aerospace í býnum Garden Grove í Orange County.
Í tanganum eru millum 22.700 og 26.500 litrar av methylmethacrylat, sum verður brúkt til at framleiða akrylplast og plexiglas.
Sambært sløkkiliðsleiðaranum í Garden Grove, Craig Covey, er bert ein spurningur um tíð, nær tangin annaðhvørt brestur ella fer at leka.
– Hesin tangin fer at broytast sundur, og vit vita ikki nær, segði hann sambært AP.
Myndugleikarnir hava givið boð um evakuering í Garden Grove og í fimm øðrum býum í Orange County, millum annað Anaheim og Westminster.
Í nátt varð roynt at steðga lekanum, men tað eydnaðist ikki.
Sambært myndugleikunum eru eingi fráboðað deyðsføll ella skaðatilburðir.
Seinni fríggjadagin upplýstu myndugleikarnir tó, at teimum hevði eydnast at fáa hitan í tanganum niður, so teir hava fingið meira tíð at finna eina loysn.
Sjúkrahúsleiðarin í Orange County ávarar um, at dampurin kann elva til trupulleikar við andadráttinum, sviða í eygunum, høvuðpínu og ilt í maganum.
