Fyri fáum vikum síðani bendi mest sum alt á, at Magdalena Andersson fór at vinna svenska ríkisdagsvalið og taka stjórnarvaldið frá Ulf Kristersson.
Men fýra dagar undan valinum er støðan broytt munandi.
Orsøkin er fyrst og fremst Liberalerna. Lítli stjórnarflokkurin, sum leingi hevur ligið langt undir fýra prosenta sperrumarkinum, fær nú 5,8 prosent í einari nýggjari Novus-kanning.
Tað er ein ógvuslig framgongd frá 1,9 prosentum fyri fáum vikum síðani. Novus metir, at framgongdin nú er hagfrøðiliga trygg.
Liberalerna hevur í endaspurtinum lagt stóran dent á, at uttan flokkin verður eingin nýggj borgarlig stjórn. Tað hevur fingið veljarar hjá bæði Moderaterna og Sverigedemokraterna at flyta seg til Liberalerna fyri at tryggja flokkinum sæti í Ríkisdegnum.
Teir fýra andstøðuflokkarnir – Socialdemokraterna, Vänsterpartiet, Centerpartiet og Miljöpartiet – fáa tilsamans 50,7 prosent. Stjórnarflokkarnir og Sverigedemokraterna fáa 48,1 prosent.
Munurin er 2,6 prosentstig og liggur innan fyri óvissumarkið. Tað merkir, at valið sunnudagin nú kann fara báðar vegir.
Samstundis vísir kanningin, at Sverigedemokraterna eru vorðnir størri enn Moderaterna. Vinnur høgrasíðan, kann tí eisini verða stríð um, hvør skal hava størstu ávirkanina á eina nýggja stjórn. Sverigedemokraterna hevur longu boðað frá, at flokkurin fer at krevja ráðharrasessir.
