Martin Kristoffur Kristiansen hevur í dag lagt ein greinastubba út á heimasíðuna hjá Eiðis kommunu, nú tiltakið, Ung í arbeiði, í morgun fór av bakkastokki í kommununi.
- Dagurin byrjaði á verkstaðnum hjá Eiðis kommunu Uppi á Grind, har tey ungu fingu kunning um, hvussu dagarnir vera skipaðir, og hvørjar uppgávurnar verða.
Eftir hesa kunning, segði borgarstjórin, Jógvan í Skorini, nøkur orð.
Borgarstjórin segði, at ætlanin við tiltakinum er, at tey ungu skulu læra nakað og fáa eina ávísa fyrireiking til vaksna lívið.
Eisini fegnaðist Jógvan í Skorini um, at so nógvar tilmeldingar eru til ársins Ung í arbeiði hesaferð.
Sum nakað nýtt í ár hava tey ungu ikki fartelefonirnar við til arbeiðis.
- Áðrenn dagarnir byrja, verða allar telefonir lagdar í ein kassa, har tær kunnu heintast eftir loknan arbeiðsdag.
Á heimasíðuni verður sagt soleiðis um hendan fyrsta arbeiðsdagin hjá ungdóminum í kommununi:
- Røsku unglingarnir eru farin til verka, og tey fara at síggjast nógv í gerandisdegnum komandi tvær vikurnar.
Í Eiðis kommunu verður heitt á allar borgarar um at vísa teimum ungu, sum nú luttaka í Ung í arbeiði, ans í ferðsluni.
