USA fer at nokta fyrrverandi franska ES-kommisserinum, Thierry Breton, og fýra øðrum evropearum, sum eru skuldsettir fyri at arbeiða fyri at sensurera amerikonsk sjónarmið á amerikanskum miðlapallum, visum.
Amerikanski uttanríkisráðharrin, Marco Rubio, lýsir í einum uppslagi á sosiala miðlinum X evropearar sum leiðarar í alheims sensurvinnuni.
- Í ov langa tíð hava hugmyndafrøðingar í Evropa verið á odda í skipaðum átøkum at noyða amerikanskar pallar at revsa amerikonsk sjónarmið, sum teir mótmæla, skrivar Rubio.
- Trump-stjórnin fer ikki longur at tola hesar ógvusligu gerðir av uttanlandssensuri, skrivar Rubio.
Uttanríkisráðharrin upplýsti ikki nøvnini á teimum fimm evropearunum, sum verða noktaðir visum í framtíðini.
Tað ger Sarah Rogers, sum er embætisfólk í amerikanska uttanríkisráðnum, í einum serligum uppslagi á X.
Ein teirra er Thierry Breton, sum var ES-kommissarur fyri innanhýsis marknað og talgildar tænastur frá 2019 til 2024.
Sambært Sarah Rogers hótti Breton amerikanska tøknimiljarderin Elon Musk í einum brævi í 2024 undan samrøðu á X við amerikanska forsetan, Donald Trump.
Í brævinum minti Breton amerikanska tøknimiljarderin á krøvini hjá ES viðvíkjandi ólógligum innihaldi og misinformatión sambært evropeiskari lóggávu, skrivar Rogers.
Tá vit tosa um misinformatión, merkir tað, at upplýsingarnar, sum verða veittar, eru tilætlað villleiðandi.
Umframt Thierry Breton verður bretin Imran Ahmed frá felagsskapinum Center for Countering Digital Hate, sum arbeiðir fyri at stríðast móti hatri á netinum, eisini noktaður atgongd til USA.
Sama er galdandi fyri Anna-Lena von Hodenberg og Josephine Ballon frá týska felagsskapinum HateAid, sum hjálpir ofrum fyri talgildum ágangi.
Tann fimta er Clare Melford, sum stovnaði Global Disinformation Index. Talan er um ein stovn, sum arbeiðir fyri at eyðmerkja og minka um útbreiðsluna av misinformatión á internetinum.
/ritzau/Reuter/
