Fyri aðru ferð uppá minni enn ein mánað noyðist amerikanski rúmdarstovnurin Nasa at útseta uppgávuna Artemis 2, har ætlanin er at senda astronautar runt um Mánan.
Hetta skrivar starvsfólkaleiðarin hjá Nasa, Jared Isaacman, á sosiala miðlinum X.
Rúmdarfarið skuldi í fyrsta lagi verða sent 6. mars, men vegna tekniskar trupulleikar er tað ikki realistiskt, at tað verður sent í mars.
– Eg dugi væl at skilja, at fólk eru vónbrotin av hesi gongdini. Hetta vónbrotið rakar ikki minst toymið hjá Nasa, sum hevur arbeitt ótroyttiliga fyri at fyrireika hetta stóra bragdið.
– Í 1960-árunum, tá Nasa náddi tí, sum flest hildu vera ómøguligt og sum ongantíð er endurtikið síðani, vóru nógv afturstig, skrivar Jared Isaacman og vísir til fyrstu mánalendingarnar.
Tann 3. februar boðaði NASA frá líknandi fráboðan. Her varð komandi útskjótingin útsett frá februar til mars.
Artemis 2-missiónin fer væntandi at vara í tíggju dagar.
Í manningini eru kanadiski Jeremy Hansen og teir tríggir amerikanararnir Christinu Koch, Reid Wiseman og Victor Glover, sum tí fara runt um Mánan og ikki lenda á honum.
Fyrsta mannaða lendingin á mánanum var í 1969, tá amerikanarin Neil Armstrong gjørdist fyrsti persónur, sum setti fótin á Mánan.
– Tað eru nógv ting, sum skilja 1960-árini frá í dag, og vónirnar skulu av røttum vera stórar við tí tíð og tilfeingi, sum er lagt í hesa skránna, skrivar Jared Isaacman.
Teir tøkniligu trupulleikarnir, sum seinka Artemis 2-missiónini, eru tengdir at veitingini av helium til rúmdarfarið. Feilirnir í skipanini vórðu funnir fríggjadagin, og skipið skal nú kannast nærri og umvælast.
Eydnast Artemis 2-missiónin, verður tað fyrstu ferð síðani 1970-árini, at menniskju verða send runt um Mánan.
Rúmdarfarið verður sent av rúmdarmiðstøðini Kennedy í Florida.
/Ritzau/
