- Eitt regnslag hoyrir til flest allar barnavognar, og tað kann vera gott í øllum regninum hjá okkum. Tað er tó nøkur viðurskiftir, ið vit skulu hugsa um, tá vit brúka regnslag til vognin.
Soleiðis siga tey í Gigni, sum veitir heilsutænastur til børn og ung.
Víst verður á, at til summar barnavognar, ið hava varufakta-eyðkennismerki, hoyrir eisini eitt góðkent regnslag, sum er mett um og góðkent at tryggja barninum nóg nógva luft.
Í Gigni siga tey, at onnur regnsløg kunnu ikki viðmælast.
- Hyggið javnan eftir elastikkinum í regnslagnum. Er tað ov leyst, kann sjálvt eitt lítið barn hála regnslagið inn og koma í vanda fyri at kvalast.
Tilmælið er bara at brúka regnslag, tá farið veðrur túr við barninum í regni, og her eigur at verða ansað eftir, um regnslagið "andar", so døgg ikki legst á innsíðuna.
- Set barnavognin undir eitt hálvtak, um tað regnar, tá barnið skal sova úti - og brúkið ikki regnslagið tá.
Í Gigni vísa tey á, at hóast vit í Føroyum ikki verða rakt av hitabylgju, hevur tað kortini týdning at ansa eftir, at børnini ikki gerast ov heit.
Flestu pinkubørn í Føroyum sova úti um dagin, og tað er sera gott við frískari luft.
- Tað hevur tó týdning, at klæðini verða lagaði til hitan, og at vognurin ikki verður ov nógv dekkaður, siga tey í Gigni.
Meira kunning um hetta kann lesast um heimasíðuna - www.gigni.fo
