Oslo verður í dag karmur um eitt øgiligt trygdarátak, tá Harald kongur verður jarðaður.
Umleið 3.000 løgreglufólk verða til arbeiðis í sambandi við statsjarðarferðina. Tað er tvífalt so nógv sum fyri 35 árum síðani, tá Olav kongur varð jarðaður.
Harumframt koma løgreglufólk úr Danmark og Svøríki at hjálpa, og miðbýurin í Oslo verður nærum fullkomiliga stongdur fyri bilum og súkklum.
Umleið 3.500 fólk úr norsku verjuni verða eisini við. Tey hava millum annað uppgávur sum heiðursvaktir og í sambandi við hátíðarligu skránna.
Yvir 150 flogfør við gestum
Stóra trygdarátakið kemst ikki minst av teimum nógvu týðandi gestunum.
Kongalig, forsetar og stjórnarleiðarar úr minst 30 londum eru í Oslo til jarðarferðina. Yvir 150 flogfør við kongaligum, ríkisleiðarum og øðrum gestum verða væntandi í floghavnini í Oslo.
Tað krevur millum annað trygd kring gistingarhúsini, persónsverju og í summum førum løgreglufylgi, tá gestirnir ferðast gjøgnum býin.
Danski fyrrverandi løgreglueftirlitsmaðurin Mogens Lauridsen, sum starvaðist í donsku løgregluni í 47 ár, kallar átakið eina ovurstóra uppgávu.
Hann skal heilt aftur til veðurlagstoppfundin COP15 í Keypmannahavn í 2009 fyri at finna eitt líknandi trygdarátak í Norðurlondum. Tá vóru umleið 40 ríkis- og stjórnarleiðarar savnaðir.
Stutt tíð at fyrireika seg
Ein serlig avbjóðing hjá norsku løgregluni er, at hon hevur havt stutta tíð at fyrireika átakið.
– Hetta er ein uppgáva, sum tú helst vilt hava sera góða tíð at leggja til rættis. Tað hava tey ikki havt, sigur Mogens Lauridsen.
Hann vísir tó á, at tað eisini kann vera ein fyrimunur. Fólk, sum møguliga ætla at gera seg inn á tiltakið ella onkran av gestunum, hava eisini havt stutta tíð at fyrireika seg.
Til samanberingar hevði danska løgreglan umleið tvey ár at fyrireika COP15.
Harald kongur verður jarðaður úr Oslo dómkirkju klokkan 12 føroyska tíð í dag.
##med2##
##med3##
/Ritzau/
