Orknoyggjar vera vertir fyri oyggjaleikunum í 2025, Føroyar vera vertir í 2027 og Oyggin Man verður vertur í 2029.
Nú hevur Áland søkt um vertsskapin fyri oyggjaleikirnar í 2031.
Lantråden á Álandi - tað sum svarar til okkara løgmann - hon eitur Annika Hambrudd, hevur vegna álendska landsstýrið boðað álendsku oyggjaleikanevndini frá, at tey stuðla alment umsóknini hjá álendsku oyggjaleikanevndini at hýsa oyggjaleikunum í 2031. Hetta skrivar Ålandstidningen.
Altjóða oyggjaleikanevndin hevur ársfund á Orknoyggjunum í summar, og tá verður umsóknin hjá álendsku oyggjaleikanevndini handað um vertsskapin í 2031.
Álendingar hava - í oyggjaleikahøpi - fleiri ítróttarannlegg, ið eru á høgum støði, og tað vónar álendska oyggjaleikanevndin kann vera Álandi til fyrimunar. Nógv ferðavinna er eisini á Álandi, so álendingar eru væl fyri at taka ímóti nógvum fólki í samband við oyggjaleikirnar.
Áland hevur tvær ferðir áður hýst oyggjaleikunum. Fyrru ferð var í 1991 og aðru ferð var í 2009.
Í 2009 vunnu Føroyar oyggjaleikirnar.
Oyggjaleikir á Álandi høvdu eisini hýst flogbólti, judo og fimleiki, og tí hevði tað verið Føroyum til fyrimunar um okkara norðurlendsku vinir í Álandi sluppu at hýsa oyggjaleikunum í 2031.
