Í dag veit ísraelska tíðindastovan, Haaretz, at siga, at átta ísraelskir hermenn eru deyðir nærindis býnum, Rafah, í Gazageiranum.
Ísraelski herurin (IDF) váttar eisini tíðindini.
Sagt verður, at hermenninir lótu lív, tá eitt hernaðarakfar fór í luftina, men fyribils verður einki sagt um, hví akfarið sprongdist.
Býurin Rafah liggur har suðuri í Gazageiranum, nærindis markinum til Egyptalands, og tað er serliga her, at bardagarnir hava verið seinastu tíðina.
Ísrael hevur sagt, at landið fer ikki at helma í við álopunum á hernaðarliga bólkin Hamas, fyrr enn felagsskapurin er jarðlagdur.
Tað var Hamas, sum leyp á Ísrael við herfólki og einum ótali av rakettum hin 7. oktober í fjør. Hamas drap nógv fólk og tók nógvar gíslar í álopinum.
