Í 1954 byrjaði ein 1. flokkur í gamla skúla á Toftum, sum er frá 1895. Tá vóru tveir lærarar, Jóhan Lamhauge og Ólavur Hátún.
Á sínum Facebook-vanga herfyri legði Jóhanna Petersen, dóttir Jóhan Lamhauge, út eina frálíka mynd av hesum skúlaflokki, sum nú hevði funnið saman aftur eftir hesi mongu ár.
- Í 1958 varð flutt í nýggja skúla, og tá vórðu flokkarnir árgangsbýttir, og tá vóru eisini fleiri lærarar.
Jóhanna Petersen greiðir frá, at úr Æðuvík komu næmingar í Tofta skúla, tá farið varð í 6. flokk og úr Rituvík í 7. flokk.
- Her var avbera gott samanhald, leggur hon aftrat.
Leygardagin 7. september vórðu hesi mongu ár hjá skúlaflokkinum, sum byrjaði í 1954, hátíðarhildin, har tver av lærarunum, Josefina og Jónsvein, vóru við.
Hinir lærararnir eru allir farnir um sýn.
- Møtt varð til seinnapartskaffi í Tofta skúla, og her mintust tey fyrst tey seks úr flokkinum, sum eru farin í annað ljós.
Eftir hetta varð prátað um farnar dagar, og sungið varð úr sanghefti, sum varð gjørt til høvið.
Jóan Pauli Joensen, professari í fólkalívssøgu, helt ein góðan fyrilestur um at vera virkin sum eldri.
Á sínum Facebook-vanga greiðir Jóhanna Petersen frá, at tey síðan fóru oman í gamla skúla, sum nú er kommunuskrivstova.
Súni í Hjøllum, borgarstjóri, tók ímóti og greiddi frá um kommununa.
- Her komu eisini nógvar stuttligar søgur upp at venda frá okkara fýra fyrstu skúlaárum. Síðan gekk leiðin inn á Hotel Runavík til veitsludøgurða.
Undir borðhaldinum á hotellinum vórðu sangir sungnir, sum hoyrdu til skúladagar fyri sjeyti árum síðan.
- Fleiri hildu røðu, og her vóru mong stuttlig og góð minnisblunk frá skúlatíðini. Vit hugnaðu okkum til langt út á kvøldið, greiðir Jóhanna Petersen frá.
