Veljið fólk, ið vilja náttúru og umhvørvi væl, og virða landsins lógir
Fyri viku síðan skrivaði eg lesarabræv um ólógliga bygging hjá Vága kommunu. https://in.fo/news-detail/wild-west
Vága kommuna byggir:
- Uttan byggiloyvi
- Uttan umhvørvisárinskanningar
- Uttan hoyring
- Uttan ognarskap
ein kirkjugarð í FJØRUNI!
Hóast friðingarmyndugleikarnir í avgerð klárt hava sagt kommununi, at hon IKKI kann byrja bygging, fyrr enn øll viðurskifti eru greidd, hava myndugleikarnir framvegis ikki steðgað kommununi.
Fyri hvønn dag, sum gongur, har ólógliga byggingin heldur fram, hækkar kostnaðurin, ið skattgjaldarin í Vága kommunu skal rinda fyri hetta óskilið. Tíbetur kann tað tó í síðsta enda verða so, at Vága kommuna og teir einstøku býráðslimirnir standa eftir við rokningini – tá eftirspælið er av!
Síðan lesarabræv mítt havi eg fingið nógvar viðmerkingar frá fólki, ið eins og eg halda hesa bygging og hesa støðu vera fullkomiliga vitleysa.
Tíverri er tað ikki einans Vága kommuna, ið ger, sum hon vil, tá umræður bygging og eyðræning av náttúru og landi okkara!
Tí mugu vit velja politikkarar, ið tora at steðga tílíkum lógloysi.
Eg fari tí at heita á allar veljarar runt Føroya land, sum í morgin skulu seta sín kross og gera av, hvør skal mynda politiska landslagið komandi fýra árini, at velja valevni, ið ikki fara at góðtaka slík mál sum hetta og hava dirvið at steðga hesum.
Valevni finnast, ið eru:
- ímóti ólógligari bygging
- ímóti umhvørvisdálking
- ímóti, at borgarin ikki sleppir til orðanna
- ímóti at náttúran verður eyðrænd.
Hava hesi mál týdning fyri teg, spyr so tað valevni, tú hugsar at atkvøða fyri, hvat hon/hann heldur um hesi evni og fer at gera við tey.
Set so krossin við fólk, ið torir og fer at steðga hesum lógloysi – soleiðis at borgarin og náttúran verða viðfarin sum lógarásett.
Maria Jacobsen
