Tað er Eirikur í Jákupsstovu, løgtingsmaður fyri Tjóðveldi, sum spyr landsstýrismannin í vinnumálum um vegasambandið um Haraldssund.
Grein 52a fyrispurningur hansara er soljóðandi:
1. Kann landsstýrismaðurin upplýsa, um nøkur verkætlan um vegasambandið um Haraldssund fyriliggur hjá Landsverki, og hvat ein slík verkætlan er mett at kosta í dag?
2. Hevur landsstýrismaðurin ætlanir um at fremja eina slíka ætlan ella eina aðra møguliga betri ætlan?
3. Um ja, hvør er tíðarætlanin hjá landsstýrinum um at fremja hesa ætlanina?
Í viðmerking til fyrispurningin vísir Eirikur í Jákupsstovu á, at síðan 1986 hevur samlaða politiska skipanin ikki raðfest vegasambandið um Haraldssund so mikið nógv, at verkætlanin nakrantíð er gjørd liðug.
– Tað hava onkrar ætlanir verið um at gera byrgingina lidna, men tað er ongantíð komið á mál.
– Tíðliga í vár varð upplýst, at ein verkætlan er gjørd hjá Landsverki, og at tað kostar 45 milliónir krónur at gera hetta arbeiðið, sum ætlanin var at fáa við í løguætlanina fyri komandi árini, sigur Eirikur í Jákupsstovu.
– Tað má metast vera sera óheppið, at verkætlanin ongantíð er gjørd liðug, og at mann nú kann hava eitt 40 ára hald fyri, at hetta ikki er gjørt, sigur hann.
