Fyrrverandi OL-gullvinnarin í skíðskjóting, Laura Dahlmeier, er deyð eftir eina klintrivanlukku í Pakistan.
Tað boðar týska tíðindastovan DPA frá, sambært Bild.
31 ára gamla týska kvinnan og klintrifelagi hennara vórðu tikin í einum skriðulopi mánadagin í 5.700 metra hædd, meðan tey stóðu á skíð.
Vanlukkan hendi um middagsleitið lokala tíð.
Bjargingararbeiði varð beinanvegin sett í verk, men økið var oyði, og nógvur vindur og vánaligt sýni hevur darvað leitingini.
Ringa veðrið hevði millum annað við sær, at bjargingarátakið hevði trupllar umstøður týskvøldið og varð steðgað.
Sambært pakistanskum myndugleikum varð tað síðani lutvíst tikið uppaftur í dag, men bert á jørðini, tí ein tyrla kundi ikki sendast upp í luftina orsakað av veðrinum.
Tvey lið av fjallaklintrarum - mannað við trimum amerikanarum og einum týskara - hava klintrað upp á fjallið ímóti økinum, har Dahlmeier hvarv.
Dahlmeier var góðkendur fjallaklintrari og skíðleiðari í økinum. Hon endaði sína yrkisleið í 2019. Tilsamans vann hon tvey OL-gullheiðursmerki og sjey HM-gullheiðursmerki.
Bæði OL-gullheiðursmerkini komu á vetrarleikunum í Pyeongchang 2018 í sprint- og pursuit-starti.
Árið fyri var Dahlmeier fyrsta kvinna, sum vann HM-gull í fimm skíðskjóting-greinum á somu kapping.
Sama árið vann týskarin samlaðu HM-kappingina.
Í 2019 endaði Dahlmeier undrunarvert sína yrkisleið sum 25 ára gomul. Hon segði, at hon var troytt bæði kropsliga og sálarliga.
Týskarin leitaði sær nýggjar avbjóðingar og hevði útbúgvið seg millum annað til at gerast góðkendur fjallaklintrari.
/Ritzau/
