Tað er staðfest hvørji koma at dystast í finalunum í badminton í einmansleiki hjá kvinnum og monnum, og tvímansleiki hjá kvinnum og monnum á oyggjaleikunum í Orknoyggjum.
Í øllum fýra finalunum fara føroyingar at kappast. So her eru í ringasta føri fýra silvurheiðursmerki tryggjaði hjá føroysku íðkarunum.
Badmintonsamband Føroya skrivar á facebook:
- MIRIAM OG RÚNI Í FINALUNUM Í EINMANSLEIKI
Tað var ein fegin landsliðsvenjari, Fai Yin Wong, sum tók eitt debrief við Miriam í Grótinum og Rúna Øster í sólini í Kirkwall í dag. Tey bæði vunnu sínar hálvfinalur í einmansleiki ímóti hvør sínum leikara frá Isle of Man.
Miriam gjørdi bart í tveimum settum, meðan Rúni mátti út í eitt triðja og avgerandi sett, har hann vann 21-16. Í finalunum møta tey bæði hvør sínum grønlendskum mótstøðuleikara. Finalurnar vera fríggjadagin.
TVEY PØR Í FINALUNUM Í TVÍMANSLEIKI
Tað eydnaðist tveimum av føroysku pørunum at vinna sær pláss í finalunum í tvímansleiki hjá ávíkavist kvinnum og monnum.
Miriam og Bjarnhild vunnu trygt á einum pari av Orknoyggjum, og skulu tær tí spæla finaluna ímóti pari úr Isle of Man, sum vunnu ein tepran trýsettara á Sannu og Miu Thorkildshøj.
Tað gjørdist ein sannur gysari hjá monnunum, sum í trimum tøttum spennandi settum vunnu á Grønlandi. Triðja settið endaði 21-18, og fingu føroysku harraparið Magnus og Rúni soleiðis hevnd fyri tapið í finaluni í liðkappingini fyri sama grønlendska parinum. Í finaluni møta føroysku harrarnir Guernsey.
Finalurnar í tvímansleiki verða leiktar fríggjadagin. Skrivar BSF á Facebook.
Í blandaðum tvímansleiki hava Miriam í Grótinum og Rúni Øster hægstu styrkismetingina. Tí skuldi verið góður møguleiki fyri, at føroyskir leikarar vera at finna í øllum fimm finalunum í tvímansleiki og einmansleiki, ið vera leiktar fríggjadagin.
