Seinastu níggju stykkini við meira um samráðingarnar eru komin afturat.
Enn kann nógv henda undan nýggjárinum í samráðingunum um at fáa enda á krígnum í Ukraina - men um avgerðir verða tiknar veldst um samstarvsfelagarnar hjá Ukraina og teirra vilja at leggja trýst á Russland.
Tað skrivar ukrainski forsetin, Volodymyr Zelensky, á sosiala miðlinum X undan fundinum við amerikanska forsetan, Donald Trump.
Fundurin verður í kvøld okkara tíð í Florida.
- Hetta eru nakrir av teimum mest diplomatiskt virknu døgunum í árinum, og nógv má avgerast áðrenn nýggjárið.
- Vit gera alt fyri at arbeiða fyri tí, men um avgerðir verða tiknar, veldst um okkara samstarvsfelagar - tey, sum hjálpa Ukraina og tey, sum leggja trýst á Russland, soleiðis at russar kunnu føla avleiðingarnar av teirra egnu ágangum, skrivaði Zelensky seinnapartin sunnudagin.
Seinasta mánaðin hava áhaldandi friðarsamráðingar verið í Evropa, Russlandi og USA.
Samstundis sum samráðingarnar eru, hevur Russland hildið fram við sínum álopum á Ukraina.
Sambært Zelenskyj hevur Russland hesa vikuna sent 2.100 álopsdronur og 900 bumbur og rakettir av ymiskum slag inn í Ukraina.
Eitt tíggju tímar langt álop leygarkvøldið og leygarmorgunin rakti orkunetið í Ukraina og gjørdi, at 320.000 húsarhald vóru uttan streym í Kiev-økinum.
Harumframt vóru 2.900 uttan hita í ukrainska høvuðsstaðnum.
Tvey fólk lótu lív í álopinum.
Sum forspæl til fundin við Trump hevði Zelenskyj leygardagin eina telefonfund við fleiri evropeiskar starvsfelagar og forsetan í ES-nevndini, Ursulu von der Leyen.
Von der Leyen skrivaði síðani á X, at ES stuðlar arbeiðinum fyri "einum rættvísum og varandi friði, sum varðveitir fullveldi og økisrætt í Ukraina".
Zelensky hitti eisini kanadiska forsætisráðharran, Mark Carney, tá hann á veg til USA vitjaði Kanada.
Russland hevur ákært Ukraina og tess stuðlar fyri at royna at oyðileggja eina fyrrverandi friðarætlan, sum USA legði fram seinast í november.
Tann ætlanin hevur fingið kritikk fyri at vera ov skeiv mótvegis russiskum áhugamálum og óhóskandi fyri Ukraina.
Fundurin millum Zelensky og Trump í dag snýr seg um eina nýggja 20-punkts ætlan, sum skal frysta stríðið á núverandi hermótum.
Ætlanin kann hava við sær, at Ukraina tekur hermenn úr eystri og loyvir at gera avmilitariserað buffaraøki, vísa smálutir, sum Zelensky avdúkaði í vikuni.
Partur av ætlanini fevnir um tvílandaavtalur millum USA og Ukraina um trygdarváttanir, endurbygging og búskap.
/Ritzau/
