Tað sigur Aksel V. Johannesen, løgmaður, millum annað í samrøðu við Sosialin.
Tað verða Bústaðir, sum skal standa fyri hesum. Tað verður gjørt soleiðis, at Bústaðir fær ella leigar fyri symbolska upphædd bygningin frá landsstýrinum og innrættar millum 43 og 55 ungdómsbýli har.
Aðalráðini flyta í næstum, Heilsumálaráðið í hølini hjá Lív í Quillingsgarði og har um leiðir, og Almanna- og Mentamálaráðið gomlu gulu smiðjuna hjá Wenzel Petersen úti í Bakka.
Løgmaður fegnast um hetta tiltakið.
– Fólk, sum lesa og læra og hava lítla inntøku, tey mugu hava ein lága leigu. Tað ber til í hesum føri, tá Bústaðir ikki skal brúka pengar at keypa bygningin fyri.
Eftir ætlan verða tað millum 43 og 55 íbúðir í bygninginum, tað veldst um støddirnar á teimum. Verða tað bara kømur, so verður talan um 55, men verða nakrar størri íbúðir, so verður talið 43. Støða er ikki tikin til tað enn, sigur løgmaður.
Spurdur um tað hevur verið eitt mál at savna øll aðalráðini nærindis Tinganesi sigur løgmaður, at tað hevur tað verið.
– Tað er ein fyrimunur bæði hjá politikarum og embætisfólki, tí tað er so nógv samstarv millum ráðini.
Spurdur um tað ikki hevði verið best at bygt ein bygning uttan fyri býin, sum kundi hýst øllum aðalráðunum undir sama taki, svarar løgmaður, at tað heldur hann ikki.
– Tað hevur verið umhugsað. Men eg eri ímóti tí. Tinganes er so søguligt, tað hevði verið øgiliga keðiligt at farið út um býin í ein stóran skrivstovubygning, heldur enn at vera her í søguliga Tinganesi. Sjálvt um tað er trongt, so er tað so sjarmerandi at vera á slíkum søguligum stað, heldur løgmaður.
Aksel V. Johannesen, lømgmaður, sigur við Sosialin, at bústaðarpolitikkurin fer fylla nógv í ólavsøkurøðuni. Hann sigur, at ein arbeiðsbólkur er júst komin við nøkrum tilmælum, sum verða tikin við, og at hetta sum longu nevnt er tann størsta avbjóðingin vit hava, sigur hann.
