Búnaðargrunnurin hevði eitt avlop á góðar 13,5 milliónir

^{Tíðindaskriv:}

Búnaðargrunnurin hevði í fjør eitt avlop á góðar 13,5 mió. kr. - Av hesum verða góðar 6 milliónir fluttar landskassanum til at fíggja umsitingina av landsjørðini.

Høvuðsendamálið hjá Búnaðargrunninum er at veita lán og stuðul til íløgur í føroyskan landbúnað.

Umframt nýggj lán fyri slakar 17 mió. kr. veitti grunnurin í 2025 eisini stuðul á góðar 19 milliónir. Meginparturin av stuðlinum verður veittur til íløgur í bygging, umframt til velting og umvæling av bøi. Síðani 2020 hevur grunnurin veitt stuðul fyri tilsamans 75 mió. kr., ið svarar til 12,5 milliónir um árið.

Við árlok 2025 hevði Búnaðargrunnurin útlán fyri 137 mió. kr., harav 8 milliónir eru avsettar til at standa ímóti møguligum tapum. Upphæddin í virðisbrøvum og tøkum peningi var tilsamans 223 milliónir, og í fjør var vinningurin av virðisbrøvum slakar 7 milliónir, ið svaraði til eitt avkast á 3,5%.

##med2##

Við úrslitinum fyri 2025 er fæið í høvuðsgrunninum nú 98 mió. kr., meðan upphæddirnar á festikontum og í felags festipuljuni samanlagt eru 223 milliónir. Tilsamans javnvigar fíggjarstøðan hjá Búnaðargrunninum við 353 milliónum, og eginognin er 346 milliónir, ið svarar til 98% av fíggjarjavnanum.

Rakstrarkostnaðurin fyri 2025 var 4,4 mió. kr., ið var góð 6% minni enn árið fyri. Síðstu tvey árini er kostnaðurin av at reka Búnaðargrunnin lækkaður við sløkum 10 prosentum.

Í leiðslufrágreiðingini verður víst á, at Løgtingið í 2025 samtykti fleiri broytingar í landbúnaðarlóggávuni, harundir eisini í lógini um Búnaðargrunn. Eitt nú varð samtykt at niðurlaga Búnaðargrunnin við 10 mió. kr. og óbeinleiðis at lækka komandi inntøkur fyri sølu av landsjørð við 20 prosentum. Greitt verður frá, at hesar og aðrar broytingar væntandi koma at hava neiliga ávirkan á virksemið hjá Búnaðargrunninum, og at útlit tí ikki eru fyri eins góðum úrslitum framyvir. Leiðslan væntar eisini, at hetta við tíðini fer merkja, at Búnaðargrunnurin lutfalsliga kemur at vikna sum stuðuls- og fíggingarstovnur, og harvið eisini at fáa lutfalsliga minni týdning sum viðleikari, tá nýggjar íløgur í framtíðini skulu gerast í landbúnaðarvinnuni.

Stjóri í Búnaðargrunninum er Egon Joensen, og Símun Gullaksen er stýrisformaður. Hini í stýrinum eru Barbara Pállsdóttir Vang, Birita Mortansdóttir, Niels Winther Poulsen og Rani Slættanes.

##med3##

##med4##

##med5##

##med6##

##med7##

##med8##

##med9##

##med10##