Tað var Jørgen Niclasen, sum setti løgmanni ein grein 52a spurning um málið. Jørgen Niclasen spurdi soleiðis:
1. Heldur løgmaður, at Djóni Nolsøe Joensen, landsstýrismaður í barna- og undirvísingarmálum, hevur fyrisitið á fullgóðan hátt í málinum um ógildan av uppsøgn av útbúgvingarstjóranum á Glasi?
2. Hvørjar avleiðingar fær viðgerðin av hesum máli?
3. Ætlar løgmaður at geva boð um at ógilda afturkallingina av nevndu avgerð?
Í svarinum til Jørgen Niclasen, løgtingsmann, vísir løgmaður á, at hann hevur biðið Barna- og útbúgvingarmálaráðið um at ummæla teir settu spurningarnar.
– Aftaná at hava lisið ummælið dugi eg ikki at síggja, at landsstýrismaðurin við barna- og útbúgvingarmálum í málinum hevur borið seg soleiðis at, at hann politiskt ella rættarligt eigur at ábyrgdast fyri tað. Hóast fyrisitingin hjá landsstýrismanninum viðgongur, at har eru hendir óhepnir fyrisitingarligir feilir í málinum, so eru hetta tó feilir, sum eru hendir á fyrisitingarligum støði og sum landsstýrismaðurin ikki kann ábyrgdast fyri, sigur Aksel V. Johannesen. løgmaður.
Til spurning 2 sigur løgmaður, athann ikki ivast í, at landsstýrismaðurin fer at taka málið upp innanhýsis í Barna- og útbúgvingarmálaráðnum.
– Sjálvur havi eg heitt á landsstýrismannin um at tryggja at slíkt mistak ikki hendir aftur, sigur hann..
Í sambandi við spurning 3 vísir løgmaður á, at eftir stýrisskipanarlógini § 33 býtir løgmaður málsøki landsstýrisins millum landsstýrisfólkini.
– Landsstýrisfólkini sita fyri málsøkjum sínum hvør sær. Eg havi tí ikki heimild at geva boð um at ógilda avgerðina, sigur Aksel V. Johannesen, løgmaður.
