Ísraelsk álop í Libanon hava dripið minst 15 fólk sunnudagin.
Tað upplýsa libanesisku heilsumyndugleikarnir.
Eitt av ísraelsku álopunum rakti grannalagið Jnah í sunnara parti av libanska høvuðsstaðnum, Beirut. Í minsta lagi fimm fólk eru deyð, meðan 52 eru særd.
Sambært ónevndari læknakeldu rakti álopið umleið 100 metrar frá Rafik Hariri universitetssjúkrahúsinum, sum er størsta almenna sjúkrahúsið í Libanon.
Varastjórin á sjúkrahúsinum sigur, at tað tók ímóti fýra deyðum - trimum sudanarum og einari 15 ára gamlari gentu - og 31 særdum.
Trý fólk doyðu í enn einum loftálopi á ein íbúðarbygning eystan fyri Beirut í býnum Ain Saadeh, meðan eitt álop í Kfar Hatta í Suðurlibanon drap sjey fólk, teirra millum ein fýra ára gomul genta.
Ísraelsk álop í Libanon hava dripið fleiri enn 1.400 fólk síðani fyrst í mars, sambært heilsumyndugleikunum í Libanon. Fleiri enn 126 børn eru millum tey deyðu.
Meira enn ein millión fólk eru flýdd innanfyri mørkini til Libanon undir seinasta stríðnum, sum hevur vart í umleið fimm vikur.
Ísrael hevur síðani 2. mars lopiið á sjiitisku muslimsku Hizbollah-herliðini úr luftini um alt Libanon og er farið undir álop á landi í sunnara parti av landinum.
Hetta hendi eftir at Hizbollah, sum er samband við Iran, leyp á Ísrael sum hevnd fyri umfatandi amerikansku-ísraelsku álopini á Iran.
Undir ísraelska og amerikanska krígnum móti Iran hevur Hizbollah áhaldandi lopið á fyrst og fremst í Norðurísrael við dronum og rakettum.
Leygardagin hótti Ísrael við at leypa á høvuðsmarkið hjá Libanon til Sýria, og tað gjørdi, at tað stongdi. Sambært ísraelska herinum verður markið brúkt av Hizbollah til hernaðarlig endamál.
Masnaa-markið er ein lívsneyðug handilsleið fyri bæði Libanon og Sýria og eitt lyklasamband til restina av økinum hjá libanesiskum fólki.
Ritzau/AFP
