34 ára gamli Neymar verður ikki klárur til fyrsta dystin móti Marokko, upplýsir brasilski landsliðsvenjarin Carlo Ancelotti sambært Reuters.
Neymar hevur drigist við ein skaða í legginum og arbeiðir framvegis við at koma fyri seg.
– Hann arbeiðir hart fyri at koma í form aftur skjótast gjørligt, sigur Ancelotti.
Venjarin vónar, at Neymar kann taka lut í fullari venjing longu í komandi viku.
Brasil fær eina trupla byrjan upp á HM, tí mótstøðuliðið verður Marokko, sum kom í hálvfinaluna í HM-endaspælinum í 2022. Dysturin verður spældur í nátt føroyska tíð.
Neymar, sum spælir fyri Santos í Brasil, hevur spælt 128 landsdystir og skotið 79 mál fyri Brasil.
Um hann kemur á vøllin seinni í endaspælinum, verður hetta fjórða HM-endaspælið hjá honum. Tað er samstundis triðju ferð, at hann missir minst ein HM-dyst vegna skaða.
