Senatið í Texas samtykti í dag broytingar í valdømunum, sum eru ætlaðar at hjálpa republikanarum á miðvalinum næsta ár.
Eftir kjak í átta tímar atkvøddu senatorarnir fyri nýggja valkortinum, sum nú verður sent Greg Abbott, guvernør, til endaliga undirskrift.
Uppskotið samtykti við 18 atkvøðum ímóti 11.
Demokratarnir hava av øllum alvi roynt at forðað fyri broytingunum, sum eru ætlaðar at skapa fimm republikanskt vinarlig valdømi.
Demokratiski senatorurin Carol Alvarado hevði ætlanir um at hildið eina langa røðu fyri at seinka atkvøðugreiðsluni leygardagin so leingi sum gjørligt - ein sokallaður filibuster.
Men senatorurin fekk ongantíð møguleikan, tá republikanarar steðgaðu kjakinum. Flokkurin ákærdi Alvarado fyri at hava brúkt røðuna til at savna inn valstríðspening í stríð við reglurnar hjá senatinum.
Fyrr í tilgongdini fóru fleiri demokratar fyribils úr Texas fyri at forða fyri, at atkvøðugreiðsla fór fram í Umboðsmannatinginum. Flýggjanin hjá demokratunum úr statinum førdi til, at stórt ans varð givið atkvøðugreiðsluni um alt USA.
Flokkurin hevur boðað frá, at hann nú fer í rættin.
Trýst hevur verið frá Donald Trump, forseta, um at fáa uppskotið um eitt nýtt kort yvir valdømi í Texas ígjøgnum.
Í statinum Kalifornia royna demokratarnir at berjast aftur við eisini at draga nýggj valdømi. Her fara veljararnir í november at atkvøða um eina tekning av økjum, sum eru ætlað at skapa fimm sessir, sum demokratarnir standa til at vinna.
Taktikkurin er kendur sum "gerrymandering". Tað verður brúkt av báðum stóru flokkunum í USA til at økja um sína ávirkan í kongressini.
Og fleiri politiskir bardagar kunnu væntast í øðrum statum um sniðgevingina av valdømum áðrenn miðskeiðisvalið í november næsta ár.
Her fara demokratarnir at royna at fáa valdið aftur í teimum báðum kømrunum í kongressini, sum republikanararnir í løtuni hava valdið á.
Republikanararnir hava eisini Donald Trump í forsetaembætinum, og tað gevur flokkinum góðar møguleikar at fáa sín politikk ígjøgnum.
Ritzau/AFP
