Logos Hope hevur seinastu dagarnar ligið við vestaru bryggju í Klaksvík, og í dag fáa føroyingar seinasta høvið at vitja skipið, áðrenn tað fer av landinum.
Skipið, sum føroyingar best kenna sum gomlu Norrønu, er nú eitt altjóða trúboðaraskip og hevur heimsins størsta flótandi bókahandil. Umborð eru fleiri hundrað sjálvboðin úr nógvum ymiskum londum.
Sunnudagsskráin byrjar klokkan 9.30 við altjóða gudstænastu umborð. Tiltakið er ókeypis, men tilmelding er neyðug.
Frá klokkan 14 lata bókasølan og kaféin upp. Í bókasøluni eru túsundatals bøkur til bæði børn og vaksin. Úrvalið fevnir millum annað um barnabøkur, skaldskap, vísindi, søgu, mál, matgerð og kristnar bøkur.
Frá klokkan 14 til 23 verður eisini skipað fyri rundvísingum umborð. Tá kunnu vitjandi síggja meira av gamla føroyska ferðamannaskipinum og fáa innlit í lívið hjá altjóða manningini.
Klokkan 19.30 verður tiltakið Next Step, sum heldur fram til klokkan 21. Tiltakið er ókeypis, men tilmelding er neyðug.
Manningarfólk av Logos Hope fara eisini í land at vitja kirkjur og samkomur kring landið. Í Betesda í Klaksvík vitja tey sunnudagsskúlan klokkan 12.30 og evangeliska møtið klokkan 18.
Vitjanin endar klokkan 22 við einari felags farvælløtu á vestaru bryggju. Farvælløtan heldur fram til klokkan 23.
Bókasølan og kaféin verða sambært skránni opnar frá klokkan 14 til á midnátt.
Nærri kunning og tilmelding til tiltøkini fæst á almennu skráarsíðuni hjá OM.
