41 ára gamli El-Sayed fekk 48,5 prosent av atkvøðunum, meðan moderata mótvalevnið Haley Stevens fekk 47,5 prosent, tá 99 prosent av atkvøðunum vóru taldar.
Sigurin verður mettur sum ein stórur sigur hjá vinstraveinginum í Demokratiska flokkinum.
– Við orðunum hjá Muhammad Ali: Vit skelkaðu heimin, segði Abdul El-Sayed eftir valið við sipan til kendu orðini hjá amerikonsku boksilegenduni.
Í november skal El-Sayed royna at vinna senatsessin frá republikanaranum Mike Rogers, sum ikki hevði mótvalevni í undanvalinum hjá republikanarum.
Abdul El-Sayed hevur millum annað gjørt seg til talsmann fyri almennari heilsutrygd, fíggjað av skattum, og hevur eisini kallað framferðina hjá Ísrael í Gaza fyri fólkadráp.
Sigurin kann elva til nýtt kjak um, hvørja kós Demokratiski flokkurin skal hava framyvir, bæði í búskaparpolitikki og í uttanríkispolitikki.
Vinstravongspolitikararnir Bernie Sanders og Elizabeth Warren stuðlaðu El-Sayed, meðan Haley Stevens hevði stuðul frá millum øðrum demokratiska oddamanninum í Senatinum, Chuck Schumer, og guvernørinum í Michigan, Gretchen Whitmer.
Eftir undanvalið hava Chuck Schumer og aðrir demokratiskir oddafólk boðað frá, at flokkurin nú stendur saman um at vinna senatsessin og styrkja møguleikarnar hjá Demokratunum á miðvegsvalinum 3. november.
