USA, Iran og ein hópur av meklarum eru í samráðingum um eina møguliga 45 daga vápnahvíld, sum kann føra til ein varandi enda á krígnum í Miðeystri.
Tað siga fýra ónevndar amerikanskar, ísraelskar og regionalar keldur við vitan um samráðingarnar við amerikanska miðilin Axios.
Sambært keldunum umrøða partarnir treytirnar í tvípartavtalu, skrivar miðilin. Fyrsta stigið skuldi vera ein møguligur 45 daga steðgur í fíggindaskapinum, har semjast skuldi verið um varandi enda á krígnum.
Vápnahvíldin kann leingjast, um tørvur er á eyka tíð í samráðingunum.
Axios skrivar, út frá teimum keldunum, sum standa tætt við samráðingarnar, at møguleikin fyri at fáa eina partvísa semju innanfyri næstu 48 tímarnar er lítil.
Keldurnar siga, at samráðingarnar fara fram gjøgnum pakistanskar, egyptiskar og turkiskar meklarar, umframt gjøgnum sms-boð millum sendiharran hjá Trump, Steve Witkoff, og iranska uttanríkisráðharran, Abbas Araghchi.
Iransk embætisfólk hava gjørt meklarunum greitt, sambært Axios, at tey ikki vilja enda í eini støðu sum Gazageiranum ella Libanon, har vápnahvíld er til á pappírinum, men har USA og Ísrael til eina og hvørja tíð kunnu leypa á aftur.
Hendan vápnahvíld royndin er sambært Axios einasti mátin at forða fyri eini dramatiskari eskalering av krígnum, sum kann fevna um stór álop á iranska sivila undirstøðukervið og hevndarálop á orku- og vatnverk í Flógvaríkjunum.
Amerikanski forsetin, Donald Trump, hevur givið Iran eina freist til týskvøldið lokala tíð. Forsetin vil hava Iran at lata uppaftur Hormuzsundið, sum er ein avgerandi miðdepil fyri at flyta olju og flótandi gass úr Miðeystri.
Trump segði sunnudagin við fleiri amerikanskar miðlar, at USA er í samráðingum við Iran, og at ein avtala má fáast í lag, áðrenn freistin gongur út týsdagin.
– Um teir ikki gera eina avtalu skjótt, so umhugsi eg at spreingja alt í luftina og yvirtaka oljuna, segði Trump við Fox News sunnudagin.
USA og Ísrael byrjaðu kríggið móti Iran 28. februar Hetta fekk iranar at de facto stongja Hormuzsundið, sum umleið ein fimtingur av heimsins olju verður fluttur ígjøgnum.
Fyrr sunnudagin legði Trump upp til í einum uppslagi á Truth Social, at USA fór at bumba brýr og virki í Iran, um Iran ikki letur týðandi farleiðina upp aftur.
/Ritzau/
