Væntandi fer ES at semjast um nýggj revsitiltøk móti ísraelskum búsetarum eftir harðskap móti palestinum á Vestara Áarbakka.
Hetta ber til eftir valdsskifti í Ungarn, sum higartil hevur verið ímóti. Tað sigur uttanríkispolitiski leiðarin í ES, Kaja Kallas, undan fundinum í Brússel í dag.
– Eg vænti eina politiska semju um revsitiltøk móti harðligum búsetarum. Vónandi fer tað at eydnast, sigur Kaja Kallas undan fundi millum uttanríkisráðharrarnar í ES.
Evnið er ovarlaga á skránni eftir fleiri harðskapstilburðir og niðursetuútbygging í ísraelskt hersetta partinum av Vestara áarbakka.
Ungarn hevur í nógv ár verið stýrt av Viktor Orbán, sum tapti seinasta valið, sum stórir partar av ES-londunum hava tikið væl ímóti.
Hann hevur sett veto móti at gera nakað við málið í nógv ár.
Péter Magyar vann valið í Ungarn, og hetta tykist hava slóðað fyri, at veto'ið verður broytt.
Sambært embætisfólkum, sum tíðindastovan AFP hevur tosað við, skulu fleiri felagsskapir aftanfyri búsetarar revsast.
Virkandi danski uttanríkisráðharrin, Lars Løkke Rasmussen, luttekur á fundinum mánadagin vegna Danmark.
– Eg haldi, at tað er momentum, men eg haldi ikki, at tað er beint nú. Men tað er greitt, at tað er ein rørsla.
– Ungarn hevur áður blokerað fyri hesum, og tað, at ein nýggj stjórn kemur, er eitt av fleiri elementum, sum kann skapa nýggja ferð í hesum málinum, sigur Løkke á veg til fundin.
Serliga er ætlanin, at sjey ísraelsk niðursetufólk og niðursetufelagsskapir skulu vera á sanktiónslistanum hjá ES. Harumframt fer ES at seta revsitiltøk í verk móti fleiri umboðum fyri hernaðarligu palestinsku rørsluna Hamas.
Bæði embætisfólk hjá ST og palestinsku myndugleikunum hava ávarað um, at tað hevur verið ein øking í talinum av deyðiligum álopum frá niðursetufólkum á Vestara áarbakka undir ísraelska og amerikanska krígnum móti Iran, sambært AFP.
Meðan ES arbeiðir við at seta nýggj revsitiltøk í verk móti ísraelskum niðursetufólkum, er eingin semja í sambandinum um at taka fleiri stig ímóti Ísrael, eitt nú at avmarka ES-handilin við landið, skrivar AFP.
/Ritzau/
