Tíðindaskriv frá løgregluni:
Føroya Politi hevði fyrireikað seg væl til uppgávuna, og sum heild hevur alt gingið friðarliga fyri seg.
Friðarlig upptakt til dystin
Seinnapartin í gjár savnaðust nógvir Brøndby-fjepparar á Skálatrøð at hita upp til dystin. Politiið var sjónligt til staðar bæði til upphitingina, og tá ið farið var til gongu niðan í Gundadal.
Onkur smávegis hending fór fram undir dystinum, har m.a. ein áskoðari varð burturvístur av Tórsvølli. Tó varð eingin handtikin undir dystinum, og sjálvur dysturin varð avgreiddur í øllum góðum.
Nógv fólk í býnum í nátt
Nógvir fjepparar fóru í býin eftir dystin, og harafturat vóru eisini nógvir bretar av fregattini, sum liggur í Havn, í býnum.
Í fleiri umførum varð neyðugt hjá politinum at leggja seg upp í spentar støður fyri at fyribyrgja og loysa ósemjur.
Trý fólk handtikin
Trý fólk eru handtikin í nátt fyri brot á skilhaldsreglurnar. Ein teirra varð seinni eisini skuldsettur fyri harðskap ímóti einum politisti. Grundlógarhoyring verður seinni í dag.
