Sambært KNR og Sermitsiaq er fyrrverandi landsstýriskvinnan í uttanríkismálum í Grønlandi, Vivian Motzfeldt, farin úr Siumut, eftir at flokkurin fór úr landsstýrinum fríggjadagin í síðstu viku.
Tað skrivaðu teir báðir grønlendsku miðlarnir týsdagin.
– Flokkurin útilokar seg sjálvan, og tað kann eg ikki vera partur av. Eg arbeiði í politikki fyri at arbeiða fyri ávirkan og geva av mær til samfelagið.
– Eg síggi onga meining í at halda fram við tí linjuni, sigur Vivian Motzfeldt sambært Sermitsiaq.
Siumut missir sostatt eisini umboð í Inatsisartut, grønlendska landstinginum.
Flokkurin hevur nú bert trý umboð á tingi.
Á landstingsvalinum í Grønlandi í mars í fjør misti Siumut seks av tíggju umboðum.
Eftir valið fór Siumut hóast alt upp í stjórnarsamgonguna, sum var mannað við øllum flokkum á tingi undantikið Naleraq.
Breiða stjórnin skal ikki minst síggjast í ljósinum av teimum hóttanum um at yvirtaka Grønland, sum amerikanski forsetin, Donald Trump, kom við í uppskotinum til tjóðartingsvalið, og sum hann seinni endurtók.
Landsstýrið, uttan Siumut, hevur framvegis meirilutan í grønlendska landstinginum.
Eftir sum stjórnarflokkar eru Demokraatit, Inuit Ataqatigiit (IA) og Atassut. Tilsamans hava tey 19 av 31 sessum í Inatsisartut.
Tað var forkvinnan í Siumut, Aleqa Hammond, sum avgjørdi at taka Siumut úr landsstýrinum.
Aleqa Hammond er misnøgd við, at tveir grønlendskir ráðharrar úr Demokraatit og IA hava valt at stilla upp til fólkatingsvalið í Danmark, sum verður 24. mars.
Vivian Motzfeldt hevur havt ein stóran leiklut í tí diplomatisku tilgongdini, sum hevur roynt at bøtt um ósemjuna við USA.
Í januar var hon í Washington D.C saman við danska uttanríkisráðharranum, Lars Løkke Rasmussen.
Her hittu teir amerikanska varaforsetan, J.D.Vance, og amerikanska uttanríkisráðharran, Marco Rubio.
/Ritzau/
