Sunnudagin hin 9. august klokkan 15, sum er sunnudagin komandi, verður serstaka konsertin og gudstænastan aftur í gjónni við Gjógv.
- Árliga siðvenjan, sum savnar væl av fólki hvørt ár, er eitt sera gott høvi at njóta eina hugnaliga og gevandi løtu í stórbæru náttúruni.
Tað siga fyrireikararnir av tiltakinum.
Í ár verður Ida Lykke Kannuberg, prestur, sum fer at tala.
- Um viðrar, verður leitað aftur til søguna við at skjútsa inn á gjónna, sum eitt minnið yvir gomlu skjúts-skylduna, sum lá á nógvum bygdum í Føroym í gomlum døgum.
Fyrireikararnir vísa á, at skyldan, áðrenn motorarnir komu til landið, var at rógva lækna, jarðarmóður ella prest til grannaoynna, tá tørvur var á tí, og tað var minni enn so altíð, at líkindini vóru góð.
- Ofta varð hetta gjørt í ivaveðri.
Á tiltakinum í gjónni við Gjógv sunnudagin verður ikki spart upp á tónleikin, har Eiðis Ljómfelag aftur leggur fyri, og hetta verður undir leiðslu av Odduri Magnusson Hentze.
##med2##
Urguleikari verður Sámal Matras Kristiansen.
Fyrireikararnir vísa á, at fyri fyrstu ferð fer eitt útlendskt kór at syngja, og tað verður Pärnu Kammerkoor úr Estlandi undir leiðslu av Elo Kesküla.
- Eitt Ensamble hjá kórinum fer eisini at framføra.
##med3##
Fyrireikararnir gleða seg til enn einaferð at bjóða fólki at njóta løtuna í stórbaru náttúruni.
- Kaffimunnur verður aftaná, verður lagt aftrat.
