Minst sjey fólk hava latið lív í einum skottilburði á einum skúla norðan fyri thailendska høvuðsstaðin Bangkok.
Tað upplýsir løgreglan sambært Reuters.
Harumframt eru minst 15 fólk særd.
Sambært thailendsku myndugleikunum er tann mistonkti gerningsmaðurin ein næmingur á skúlanum. Hann hevur sambært løgregluni tikið lívið av sær eftir álopið.
Undirvísingarmálaráðharrin, Prasert Jantararuangtong, sigur við Reuters, at bæði lærarar og næmingar eru millum tey deyðu.
Skottilburðurin fór fram á Debsirin Nonthaburi School í Bang Kruai-økinum í Nonthaburi-landspartinum.
Sambært løgregluni drap gerningsmaðurin fyrst ommu sína og abbabeiggja í heiminum, áðrenn hann fór á skúlan og lat skot av.
Løgreglan upplýsir, at hann skjeyt 26 ferðir. Harumframt vórðu 34 óbrúktar patrónir funnar á staðnum.
Ein 18 ára gamal næmingur sigur við Reuters, at hann fyrst helt, at talan var um fýrverk ella harðar brestir.
– Eg helt í fyrstani ikki, at tað var ein byrsa. Tað komu nógv skot: bang, bang, bang. So varð friðarligt, og síðani byrjaði tað aftur, sigur hann.
Skúlin hevði í skúlaárinum 2025 umleið 3.100 næmingar og 147 lærarar.
Hetta er annar skottilburðurin á einum skúla í Thailand í ár.
Í februar varð ein lærari dripin og ein næmingur særdur í einum skottilburði í Hat Yai í sunnara parti av landinum.
Hóast Thailand hevur lutfalsliga strangar vápnalógir, hava fleiri álvarsamir skottilburðir verið í landinum seinastu árini.
Versti einstaki hópdrápstilburðurin í Thailand var í 2022, tá ein fyrrverandi løgreglumaður drap 36 fólk við knívi og skotvápnum.
##med2##
