Tann, sum er undir illgruna fyri morðroynd móti amerikanska forsetanum, Donald Trump, hevur noktað seg sekan í øllum ákærunum. Tað skrivar Reuters.
Tann mistonkti gerningsmaðurin, 31 ára gamli Cole Tomas Allen, er ákærdur fyri at hava staðið aftanfyri eina álopsroynd á einum tíðindafólkadøgurða í Washington, D. C. 25. apríl.
Hann tosaði ikki í rættinum í dag, tá verjin hjá honum gav útsøgnina hansara vegna. Ákærurnar fevna um morðroynd á forsetan, álop á ein løgreglumann og brotsverk í sambandi við vápn.
Hann er ákærdur fyri tilsamans fýra brotsverk, har tað álvarsligasta er roynd at drepa Donald Trump.
Hann fær lívsfongsulsrevsing, um hann verður dømdur fyri at hava roynt at dripið Trump undir einum árligum døgurða fyri fjølmiðlafólki á Washington Hilton hotellinum í amerikanska høvuðsstaðnum.
Sambært ákærunum fór hendingin fram í økinum uttan fyri sjálva matstovuna, sum varð avbyrgt sum trygdarsona.
Her fór Allen gjøgnum eina trygdarkanning á hotellinum og skeyt fleiri skot.
Trygdarfólk svaraðu aftur og skutu fleiri skot móti Allen, men hann varð ikki raktur.
Eitt starvsfólk hjá Secret Service varð skotið, men slapp undan uttan álvarsligan skaða takkað verið einum skottryggum vesti.
Melania Trump og varaforsetin J.D. Vance vóru millum luttakararnar, men vórðu skjótt flutt burtur.
2.600 fólk skuldu vera við til árliga fjølmiðlafólkaborðhaldið. Trump hevur áður boykottað borðhaldið, men avgjørdi at vera við í ár.
Forsetin fekk ikki skaða í miseydnaða álopinum og hevur síðani kravt, at borðhaldið verður flutt til annan dag.
Rættarfundurin í dag setti eisini gongd á næsta stóra rættarstríðið í málinum, skrivar Reuters.
Allen roynir at fáa virkandi løgmálaráðharran Todd Blanche og ákæran Jeanine Pirro tiknar úr málinum. Báðir vóru til staðar til borðhaldið og kunnu hava verið millum mál hansara, stendur í klaguni.
– Tað er púra óhóskandi, at offur fyri einari hending sum hesari sjálvi ákæra málið, sigur advokaturin hjá Allen, Eugene Ohm, sambært Reuters.
Pirro segði áður við CNN, at "mín førleiki at ákæra hetta málið hevur einki við tað at gera, at eg var har".
Eftir skottilburðin skrivaðu fleiri amerikanskir miðlar um eitt manifest, sum 31 ára gamli Allen eftir øllum at døma sendi til familjulimir áðrenn álopið.
Sambært Associated Press finst hann í tekstinum Trump-stjórnini og lýsir seg sjálvan sum ein "vinarligan samveldisdrápsmann".
/Ritzau/
