Amerikanski elbilaframleiðarin Tesla seldi góðar 1,6 milliónir bilar um allan heimin í 2025.
Tað sæst av sølutølum, sum Tesla almannakunngjørdi í dag.
Hetta er væl undir søluni í 2024, har felagið leveraði beint undir 1,8 milliónir bilar, og er eisini langt aftan fyri søluna hjá kappingarneytanum BYD úr Kina, sum seldi beint undir 2,3 milliónir elbilar í 2025.
Sostatt kann Tesla ikki longur kalla seg heimsins størsta framleiðara av elbilum.
Meðan sølan hjá amerikanska framleiðaranum er minkað, hevur BYD havt ein søluvøkstur uppá næstan 28 prosent.
Tesla hevur seinastu tíðina upplivað minni eftirspurning og samstundis vaksandi kapping frá kappingarneytum, serliga úr Kina.
Lægri eftirspurningurin eftir Tesla-bilum hevur verið settur í samband við, at stjórin Elon Musk hevur verið við í amerikanskum politikki, serliga at hann var við í stjórnini undir Donald Trump í byrjanini av árinum.
Enn er ikki greitt, hvussu fallandi sølan fer at ávirka botnlinjuna hjá Tesla.
Felagið leggur ikki ársfrágreiðingina fram fyrr enn 28. januar.
BYD hevur heldur ikki almannakunngjørt sín roknskap enn.
Í 2024 endaðu inntøkurnar hjá Tesla við 97,7 milliardum dollarum. Hetta var nakað meira enn árið fyri, men verður hugt eftir inntøkunum frá bilasøluni einans, so vóru inntøkurnar falnar seks prosent.
Partur av frágreiðingini var, at Tesla hevði lækkað prísirnar nógv fyri betur at kunna kappast við fyritøkur úr Kina og Evropa, sum bjóðaðu bíligari elbilar.
Talið av seldum bilum í 2024 var eisini minni enn árið fyri, tó bert eitt sindur. Tað var fyrstu ferð í søguni hjá Tesla, at talið av seldum bilum var minkað. Hesaferð er sølan fallin enn meira.
Teir eitt sindur meira enn 1,6 milliónir bilarnir, sum Tesla seldi í 2025, eru 8,6 prosent færri enn í 2024.
/Ritzau/
