Trý føroyingalið vunnu og eitt tapti

Í kvøld var seinasta leikumfarið leikt í hesum árinum í bestu íslendsku hondbóltsdeildini hjá monnum. 

Í einum ótrúliga málríkum dysti vunnu Bjarni í Selvindi, Allan Norðberg og liðfelagarnir í Vali á útivølli 43-40 á Selfossi. Tað má vera óhoyrt, at eitt lið skorar 40 mál í einum dysti, og tapir kortini. Í steðginum var Valur á odda 23-19.

Bjarni skoraði fimm mál, og Allan skoraði eitt mál.

Sveinur Olafsson og liðfelagarnir í Afturelding vunnu á heimavølli 34-31 á ÍR. Í steðginum var støðan javnleikur 17-17. 

Sveinur skoraði trý mál.

Dánjal Ragnarsson og liðfelagarnir í Fram vunnu á útivølli ein flottan 27-25 sigur á Haukum, ið vóru oddalið undan dystinum í kvøld. Í steðginum var Fram á odda 13-12.

Dánjal skoraði tvey mál.

Jóhannes Bjørgvin og liðfelagarnir í Stjörnuni taptu á útivølli 31-33 fyri FH. Stjarnan var annars á odda 17-15 í steðginum.

Jóhannes skoraði tvey mál. 

Nú verður vetrar og HM-steðgur í deildini fram til 4. februar. Tvey føroyingalið eru fremst í deildini, og øll fýra føroyingaliðini eru millum átta tey fremstu liðini, og liggja sostatt øll til at skula spæla endaspæl.

Tveir føroyingar hava tó ikki vetrarfrí enn. Fjórðingsfinalurnar í steypakappingini verða spældar 19.desember. Dánjal og Fram skulu til Akurereyrar at spæla ímóti KA. Sveinur og Afturelding taka imóti FH í Mosfellsbær. Vinnandi liðini koma við í Final 4.

Støðan