Um tað stendur til kinesiska forsetan, Xi Jinping, mugu dyrnar hjá Kina latast meira upp fyri amerikanskum fyritøkum.
Tað segði hann hósdagin við eina sendinevnd av amerikanskum ovastu leiðarum, sum eru saman við amerikanska forsetanum, Donald Trump, á vitjan í Kina.
Tað siga kinesiskir almennir miðlar.
– Dyrnar hjá Kina til umheimin fara at lata seg meira og meira upp. Amerikanskar fyritøkur fara at kunna gleða seg til enn betri útlit í Kina, stendur í fráboðanini.
Xi Jinping hitti sendinevndina av ovastu leiðarum, sum fevnir um miljarderin Elon Musk, stjóran í Nvidia, Jensen Huang, og Tim Cook hjá Apple í Stóru Høllini, skrivar Reuters.
Donald Trump, sum eisini hitti sín kinesiska starvsbróður hósdagin, hevði undan fundinum sagt, at hann fór at biðja Xi Jinping um at lata meira upp.
– Eg fari at biðja Xi forseta, ein leiðara við óvanligum karakteri, um at "opna upp" fyri Kina, soleiðis at hesi genialu fólkini kunnu brúka síni kynstur og vera við til at fáa Fólkalýðveldið (Kina, red.) upp á eitt enn hægri stig!, skrivaði hann á sínum sosiala miðli, Truth Social, mikudagin.
Reuters hevur áður skrivað, at stjórar frá BlackRock, Blackstone, Boeing, Cargill, Citi, Cisco, Coherent, GE Aerospace, Goldman Sachs, Illumina, MasterCard, Meta, Micron, Qualcomm og Visa eisini vóru bodnir til Kina.
Eftir fundin millum teir báðar forsetarnar og amerikansku ovastu leiðararnar segði Elon Musk við tíðindafólk, at fundurin hevði verið "stórbærur", meðan Jensen Huang segði, at teir báðir forsetarnir vóru "ótrúligir".
Men møguleikarnir hjá amerikanskum fyritøkum í Kina vóru ikki einasta evnið, sum varð umrøtt á fundinum millum Donald Trump og Xi Jinping.
Sambært almennu sjónvarpsstøðini CCTV gjørdi kinesiski forsetin greitt, at Kina og USA kunnu enda í stríði, um málið um Taiwan ikki verður handfarið rætt í eygunum á Kina.
Taiwan er ein oyggj umleið 180 kilometrar í ein útsynning úr Kina. Tað metir seg vera sjálvstøðugt ríki. Oyggin hevur egið gjaldoyra og sína egnu politisku og rættarskipan.
Kina metir Taiwan vera sítt øki og hevur ikki útilokað at brúka hernaðarmegi til at taka valdið á oynni.
USA viðurkennir ikki Taiwan sum sjálvstøðugt ríki, men er tó størsti vápnaveitari í oynni.
Sambært Reuters segði Trump mánadagin, at hann fór at tosa við Xi Jinping um amerikanska vápnasøluna til Taiwan, hóast USA søguliga hevur hildið fast um ikki at ráðføra seg við Kina um evnið.
Ritzau/AFP
